This is where your taxes go: KURAKOT!

THIS IS WHERE YOUR TAXES GO: KURAKOT!

saan napunta ang buwis ng taumbayan?

tanong iyan ng ating mga kababayan:

OFW, manggagawa, kabataan,

kababaihan, dukha, simpleng mamamayan

saan? nasa bulsa ng buwayang kurakot!

saan pa? sa bulsa ng buwitreng balakyot!

saan pa? sa bulsa ng tongresistang buktot!

ha? sinagpang pa ng ahas! nakalulungkot!

buwis iyon ng bayan! bakit ibinulsa?

para sana di binabaha ang kalsada

bata'y walang bahang papasok sa eskwela

obrero'y walang baha tungo sa pabrika

ay, kayrami palang buwaya sa Senado

insersyon sa badyet, sa ghost project daw ito

pulos mga buwitre naman sa Kongreso

na badyet sa Malakanyang ay aprubado

O, kababayan, anong dapat nating gawin

kung tayo ang botante't employer nila rin

mga kurakot ay ating pagsisibakin!

sa halalan, sila'y huwag nang panalunin!

- gregoriovbituinjr.

11.16.2025

* litrato mula sa google

Ihing kaypalot

IHING KAYPALOT

naamoy ko ang palot na iyon

habang lulan ng dyip tungong Welcome

Rotonda, kaytinding alimuom

na talaga ngang nasok sa ilong

sa pader, ihi'y dumikit dito

kaya pulos karatula rito

saanman magawi ay kita mo

may pinta: Bawal Umihi Dito

kayhirap maamoy ang mapalot

dahil sa ilong ay nanunuot

di pupwede sa lalambot-lambot

baka hinga'y magkalagot-lagot

dapat umihi pag naiihi

kung pantog puputok nang masidhi

subalit saan tayo gagawi

kung walang C.R. nang di mamanghi

kailan pa tao matututo

pader ay di ihiang totoo

upang di magkasakit ang tao

upang di labag sa batas ito

- gregoriovbituinjr.

11.15.2025

A-kinse na

A-KINSE NA

may kwento noong ngayo'y aking naalala:

minsan daw ay lumindol doon sa pabrika

sigaw ng isa: nakupo! katapusan na!

ang sagot ng isa: a-kinse pa lang, tanga!

tulad ng petsa ngayon: Nobyembre a-kinse

sweldo na naman, paldo muli si kumpare

at may pang-intrega na siya kay kumare

may pampa-tuition na sa anak na babae

inaabangang sadya ang araw ng sahod

matapos kinseng araw na nagpakapagod

na ramdam ng manggagawa'y nakalulugod

lalo na't sa pamilya siya ang gulugod

O, kinsenas, kapag ikaw na ang dumatal

nagkalipak man ang palad at kumakapal

ginhawa'y dama matapos ang pagpapagal

sana'y di magkasakit, buhay pa'y tumagal

- gregoriovbituinjr.

11.15.2025

Bumerang

BUMERANG

matapos raw ang kaytinding bagyo

matapos humupà ang delubyo

mababakas ang gawa ng tao

basura'y nagbalikang totoo

tinapon nila'y parang bumerang

tulad ng plastik sa basurahan

mga binasura'y nagbumerang

tinapon sa kanal naglabasan

parang mga botanteng nasukol

na binoto pala nila'y ulol

binotong sangkot sa ghost flood control

na buwis sa sarili ginugol

binoto'y mga trapong basura

na nagsisibalikan talaga

upang sa masa'y muling mambola

mga trapong dapat ibasura

at kung káya'y huwag pabalikin

ang dapat sa kanila'y sunugin

upang di na makabalik man din

basura silang dapat ubusin

- gregoriovbituinjr.

11.14.2025

* komiks mula sa pahayagang Bulgar, 11.13.2025, p.5    

DPWH ba'y paniniwalaan pa?

DPWH BA'Y PANINIWALAAN PA?

mukhang DPWH nagpapabango

nasa headline sila ng isang pahayagan

nagsalitâ sa pananalasa ng bagyo

mga pambansang daan ay di madaanan

di mo na tuloy alam kung anong totoo

pag DPWH na ang nagsalitâ

silang pangunahing sa kurakot nabisto

ay mag-uulat sa bayan hinggil sa sigwâ

maniniwala ba o ito'y guniguni

tulad ng pinag-uusapang ghost flood control

aasahan ba ang kanilang sinasabi?

e, kawatan at sinungaling nga'y mag-utol

flood control project ba'y sasabihing maayos?

at di substandard ang gamit na materyales?

matitibay daw ang gawa kahit mag-unos

e, maraming binaha, duda'y di naalis

DPWH ba'y paniniwalaan

ng bayang galit sa mga trapong kurakot

ahensyang pangunahin nga sa kurakutan!

O, DPWH, dapat kang managot

- gregoriovbituinjr.

11.13.2025

* litrato mulâ sa headline ng pahayagang Pang-Masa, Nobyembre 11, 2025

Mababaw man ang kaligayahan ko

MABABAW MAN ANG KALIGAYAHAN KO

mababaw lang daw ang kaligayahan ko

kaya natatawa sa mumunting bagay

dahil diyan, napaisip tuloy ako:

ano ang malalim na kaligayahan?

mababaw lang ako, makakain lamang

ng tatlong beses isang araw, ayos na

di ko kaylangan ng kotse't kaharian

na sa kamatayan, di ko madadala

mababaw ako ngunit kayang sumisid

nakakangiti pa rin kahit na pagod

kasama'y dukhang nabubuhay sa gilid

kaysa korap na nabundat sa kurakot

oo, inaamin ko, mababaw ako

kaysa malalim nga, di naman masaya

ay, ako'y isa lang karaniwang tao

maglulupâ, makatang lingkod ng masa

- gregoriovbituinjr.

11.13.2025

Korapsyon: Kung anong bigkas, siyang baybay

KORAPSYON: KUNG ANONG BIGKAS, SIYANG BAYBAY

ni Gregorio V. Bituin Jr.

Nabasa ko ang sinulat ni National Artist Virgilio S. Almario sa kanyang kolum na Filipino Ngayon sa pesbuk hinggil sa baybay ng salin sa wikang Filipino ng corruption. Tinalakay nga niya kung korupsiyon ba o korapsiyon ang tamang salin. Basahin ang kanyang sanaysay na may pamagat na KORUPSIYON O KORAPSIYON? sa kawing na: https://web.facebook.com/photo?fbid=1403137705151190&set=a.503294381802198

Pansinin. Sa dalawang nabanggit na salitâ ay kapwa may titik i sa pagitan ng titik s at y. Hindi niya binanggit ang salitang korapsyon. Palagay ko'y dahil mas akademiko ang kanyang talakay.

Sa karaniwang manunulat tulad ko, natutunan ko ang isang batas sa balarila na nagsasabing kung anong bigkas ay siyang baybay. O kung paano sinabi ay iyon ang ispeling.

Kaya sa wari ko ay walang mali sa salitang korapsyon o kaya'y kurapsyon. Di tayo tulad ng mga Inglesero na talagang mahigpit sa ispeling.

Ang salitang korapsyon ang ginamit ng mga taga-Pasig sa kanilang konsiyertong Pasig Laban sa Korapsyon noong Nobyembre 8, 2025, kung saan isa ako sa naimbitahang bumigkas ng tulâ hinggil sa nasabing napapanahong isyu.

Kaya ang salitang korapsyon ang gagamitin ko sa ipapagawa kong tarp para sa paglahok sa isang konsyerto sa Nobyembre 22, kung saan nakasulat: National Poetry Day 2025: TULA'T TULIGSA LABAN SA KORAPSYON. Planong ganapin iyon sa isang komunidad ng maralita sa Malabon. Tutulâ ako sa konsiyerto bilang sekretaryo heneral ng pambansang samahang Kongreso ng Pagkakaisa ng Maralitang Lungsod (KPML).

Ang salitang iyon din ang madalas kong gamitin sa pagkathâ ng tulâ. At iyon din ang naisip kong gamitin sa isang munting aklat ng tulâ na ilalabas ko sa Disyembre 9, kasabay ng International Anti-Corruption Day. Ang nasabing libreto, na sukat ay kalahating short bond paper at nasa limampung pahina, ay may pamagat na TULA'T TULIGSA LABAN SA KORAPSYON.

Gayunman, iginagalang ko ang pagtingin ni Rio Alma (sagisag sa pagtulâ ni V. S. Almario) hinggil sa korupsiyon o korapsiyon. Si Sir Rio ay naging gurô ko sa pagtulâ sa LIRA (Linangan sa Imahen, Retorika at Anyo) nang kumuha ako ng pagsasanay rito mula Setyembre 1, 2001 hanggang grumadweyt dito noong Marso 8, 2002.

Halina't abangan ang paglulunsad ng munting aklat laban sa korapsyon sa Disyembre 9, ang pandaigdigang araw laban sa korapsyon. Inaayos lang ang lugar na paglulunsaran ng aklat.

11.12.2025

P.S. Salamat kay Ninong Dado sa litrato

Ang payò nila hinggil sa pag-inom

ANG PAYÒ NILA HINGGIL SA PAG-INOM

birthday ni Dad sa Disisyete ng Nobyembre

pamangkin ko sa Disiotso ng Nobyembre

Disinwebe naman ang utol kong babae

habang utol kong lalaki'y sa Bentesyete

ngayong a-Onse, ikalimang death monthsary

ng aking butihing asawang si Liberty

ano't kayraming kaganapan ng Nobyembre

sa araw ni Bonifacio pa'y magrarali

may payò nga ang ama kong namayapa na

na hanggang ngayon ay akin pang dala-dala:

"Huwag kang mag-iinom pag nalulungkot ka.

Mag-inom lang kung may okasyon o masaya."

tiyak, iyan din ang nanaisin ng sinta

huwag kong lunurin sa alak ang problema

oo, sa payò sa akin ay tama sila

Dad, Libay, salamat sa inyong paalala

- gregoriovbituinjr.

11.11.2025

* litrato kuha sa kalapit na bar habang isang oras na naghihintay na magawâ ang tarp

Sana, Bagyo, tinangay mo na ang mga kurakot!

SANA, BAGYO, TINANGAY MO NA ANG MGA KURAKOT!

kayrami nang namatay sa bagyong Tino sa Cebu

si bagyong Uwan, nanalasa sa bansa ni Juan

sana ang tinangay nila'y korap na pulitiko

na nagpakasasa't nandambong sa pondo ng bayan

sana, namatay sa bagyo'y yaong mga kurakot

na birthday wish ng broadcaster na si Ms. Kara David

sana, inanod sa baha'y mga trapong balakyot

at di yaong mga mahihirap nating kapatid

bagyuhin sana'y mga kurakot sa ghost flood control

na nagsibukol ang bulsa sa nakaw nilang pondo;

salamat po, Sierra Madre, sa iyong pagtatanggol

sa maraming kababayan, lungsod at munisipyo

subalit kayrami mang SANA, baka di matupad

kung tao'y di kikilos upang ibagsak ang bulok

kung ang gulong ng katarungan ay sadyang kaykupad

at nanunungkulan pa rin ang mga trapong bugok

- gregoriovbituinjr.

11.11.2025

* litrato mula sa pahayagang Remate, 11.08.2025

Lagot sila kay Agot

LAGOT SILA KAY AGOT

artistang si Agot Isidro, may tanong sa atin

di palaisipan ngunit ating pakaisipin:

"Kung kayo si Sierra Madre, sinong iboboto n'yo?"

na sinundan pa, "Yung papayag na kalbuhin kayo?"

may pasaring pa, "Panay ang Salamat Sierra Madre,

pero iboboto, yung mga pro-mining." mensahe

n'ya'y tagos, anya pa, "So alam na next election ha."

simpleng pahayag, sa puso'y kumukurot talaga

sa ulat ay nagawa raw ng mga kabundukan

ng Sierra Madre puksain, mata ng bagyong Uwan

kaya maraming sa Sierra Madre nagpasalamat

tila isa itong paanyayang gawin ng lahat

maraming salamat sa mga pasaring mo, Agot

sa mga minahang naninira ng mga bundok

lalo sa mga pulitikong kurakot at buktot

na nararapat lang na mapiit at mapanagot

- gregoriovbituinjr.

11.11.2025

* ulat mula pahayagang Abante, 11.11.2025, p.5    

Sa panlimang death monthsary ni misis

SA PANLIMANG DEATH MONTHSARY NI MISIS

ginunita ngayong a-Onse ng Nobyembre

muli'y pagsinta ang padala kong mensahe

sa panglimang death monthsary ng aking misis

nagpapakatatag kahit naghihinagpis

di pangkaraniwang araw bawat a-Onse

ng buwan, inaalala ang kinakasi

marami mang trabaho ay gugunitain

bawat a-Onse ay may tulang kakathain

napakapayak man ng aking nagagawâ

nagninilay bilang tanda ng paggunitâ

sa tahanan ay may kandilang itinirik

habang sa iwing puso'y may sinasatitik

tititigan kong muli ang iyong larawan

na tanging magagawâ sa kasalukuyan

bagamat maraming pagtutuunang pansin

saliksik, pagsasalin, pagkilos, sulatin

- gregoriovbituinjr.

11.11.2025

Ang demokrasyang batid ng dinastiya

ANG DEMOKRASYANG BATID NG DINASTIYA

Ang demokrasya raw ay

OF the prople,

FOR the people,

and BY the people

na mababasa

sa Gettysburg Speech

ni Abraham Lincoln

subalit iba

ang pagkaunawa

ng dinastiya

sa demokrasya,

o marahil nga'y

iniba nila:

Sa kanila

ang demokrasya ay

OFF the people,

POOR the people,

and BUY the people.

hindi kasama ang tao

pahirapan ang tao

at bilhin ang tao

o marahil

ang POOR the people

ay POUR the people

ng mga ayuda

upang iboto

muli ang trapo

- gregoriovbituinjr.

11.10.2025

* mga litrato mula sa pahina ng Partido Lakas ng Masa (PLM)

Si Prof. Xiao Chua at ako

Litrato kuha sa book launching ng "1 Xiao Time, Mga Dakilang Pilipino" sa HistoEx (History to Experience) sa Gateway 2, Cubao, QC, Agosto 3, 2025.

Litrato kuha sa Bantayog ng mga Bayani, Oktubre 22, 2022, sa aktibidad na Balik-Alindog Bantayog.

SI PROF. XIAO CHUA AT AKO

Mabuti't natatandaan pa ako ng historyan na si Prof. Michael Charleston "Xiao" Chua nang makabili ako ng aklat niyang "1 Xiao Time, Mga Dakilang Pilipino" sa HistoEx (History to Experience) sa Gateway 2 sa Cubao. Natandaan niya ako dahil isinulat niya ang dedikasyon sa aking pangalan.

3 Agosto 2025

Para kay Greg Bituin,

Bayani ng kalikasan!

Xiao Chua

Nakatutuwa dahil isinulat niya roon ang "Bayani ng kalikasan!" na ibig sabihin, tanda niya na naging magkatabi kami sa upuan noong 2016 nang dumating dito sa Pilipinas si dating US Vice President Al Gore para sa tatlong araw na Climate Reality training. Dinaluhan din iyon ng aking namayapang asawang si Liberty, na di ko pa asawa noong panahong iyon. Naganap iyon sa Sofitel sa Lungsod Pasay noong Marso 14-16, 2016. Nakabili noon si Prof. Xiao ng dalawa kong aklat, ang "Sa Bawat Hakbang, Climate Walk mula Luneta hanggang Tacloban" na katipunan ng mga tula sa paglalakad mula Luneta hanggang Tacloban noong bago mag-unang anibersaryo ng super typhoon Yolanda, at ang aklat ko ng mga sanaysay na may pamagat na "Ang Mundo sa Kalan". Dalawang aklat hinggil sa kalikasan.

Kaytindi ng memorya o photographic memory ni Prof. Xiao, pagkat siyam na taon makalipas ay tanda pa niya ako kaya may mensaheng 'Bayani ng kalikasan!' Mga kataga itong ngayon ay nagsisilbing isnpirasyon ko kaya nagpapatuloy ako sa pagtataguyod ng pagprotekta sa kalikasan at pagiging aktibo sa mga organisasyong makakalikasan, tulad ng Green Convergence, SALIKA (Saniblakas ng Inang Kalikasan) at PMCJ (Philippine Movement for Climate Justice (PMCJ). Siya pa lang ang nagtaguri sa akin ng ganyan mula pa nang maging aktibo ako sa kilusang maka-kalikasan o environment movement noong 1995 dahil sa imbitasyon ni Roy Cabonegro, environmentalist na tumakbong pagka-Senador ng Halalang 2022 at 2025. Opo, makalipas ang tatlumpung taon. Maraming salamat, Prof. Xiao.

Ikalawang pagtatagpo namin ni Prof. Xiao Chua ay noong Oktubre 22, 2022 sa Bantayog ng mga Bayani kung saan maraming boluntaryo ang naglinis doon sa panawagang Balik-Alindog, Bantayog, at nabigyan ako roon ng t-shirt. Nakabili rin siya ng aklat ko ng saliksik ng mga tula at akdang Liwanag at Dilim ni Gat Emilio Jacinto, na matalik na kasama ni Gat Andres Bonifacio sa Katipunan, aklat na 101 Tula, at dalawang isyu ng pahayagang Taliba ng Maralita ng samahang Kongreso ng Pagkakaisa ng Maralitang Lungsod (KPML).

Ikatlong pagtatagpo, ako naman ang bumili ng libro niyang "1 Xiao Time, Mga Dakilang Pilipino". Naganap iyon sa launching ng kanyang aklat sa booth ng Philippine Historical Association (PHA) sa Gateway 2, Araneta Center sa Cubao, Lungsod Quezon noong Agosto 3, 2025. Bumili rin ako roon ng kanilang mug o tasa para sa kape na may tatak na Philippine Historical Association (PHA) na siya kong ginagamit ngayon habang nagsusulat.

Mabuhay ka at maraming salamat, Prof. Xiao Chua!

At muling nangalampag si Uwan sa bahay ni Juan

AT MULING NANGALAMPAG SI UWAN SA BAHAY NI JUAN

ngayong lamang, muling nanalasa si Uwan

kinalampag ang bubong ng bahay ni Juan

maririnig mo ang rumaragasang hangin

na tila ba bahay ay kanyang lalamunin

buti't bubong ng bahay pa rin ay matibay

kinakaya si Uwan na kaytinding tunay

tila ba tayo'y pilit niyang nilulupig

tila ba ulan at hangin ay nagniniig

anong gagawin natin kundi ang magbasa

ng aklat, o magsalin ng asignatura

basta tiyaking gamit ay di mababasâ

kaya maging alerto lagi't maging handâ

sige lang, Uwan, ilabas mo ang galit mo

habang galit ng bayan, ilabas ding todo

sa mga kurakot, dapat silang masingil

silang kawatan sa pondo'y dapat mapigil

- gregoriovbituinjr.

11.10.2025

* mapapanood ang munting bidyo sa kawing na: https://web.facebook.com/share/v/1BqXsyJAiF/ 

Sunny side up sa sinaing

SUNNY SIDE UP SA SINAING

paano kung wala kang mantika sa bahay

maulan at baha, ayaw mo nang lumabas

subalit nais ng anak mo'y sunny side up

na itlog, may paraan kung nais lumingap

sa sinaing, bago pa mainin ang kanin

bakatan ng puwet ng baso ang sinaing

pag may puwang na, itlog ay iyong basagin

at ilagay lang sa puwang, lagyan ng asin

ang itlog, sandali'y lilipas, pag nalutò

presto! may sunny side up na ang iyong bunsô

sunny side up sa kanin, tanda ng pagsuyò

at matalinong diskarteng di naglalahò

may sapaw ka pang okra, may sunny side up pa

anong sarap ng kain ninyo sa umaga

sa gas o sa kuryente'y nakatipid ka na

mga mahal mo'y matutuwa pang talaga

- gregoriovbituinjr.

11.10.2025

Panawagan nila'y parusahan na ang mga kurakot!

PANAWAGAN NILA'Y PARUSAHAN NA ANG MGA KURAKOT!

kinunan ko ng litrato nang makita ang panawagan

na "Parusahan ang mga magnanakaw sa ating bayan

at mga kasabwat na Kontraktor, Senador at Kongresman"

ng UP Workers Union, aba'y sang-ayon din ako riyan

ang mga kurakot, pag di naparusahan, babalik din

sa kanilang krimen at karumal-dumal nilang gawain

imbes magsilbi sa bayan, bulsa nila'y pabubukulin

kawawa muli ang bayan sa mga buwayang salarin

kaya dapat parusahan lahat ng mga nasasangkot

at nandarambong sa pondo ng bayan, silang mga kurakot

dapat may mga ulong gumulong, kundi man ay mapugot

parusahan na sila hanggang buto'y magkalagot-lagot

kaybilis ng batas mamarusa pag dukha ang nang-umit

ng isang mamon upang may mapakain sa kanyang paslit

ngunit pag mayayamang bilyon-bilyong piso na'y kinupit

may due process pa ang mga walanghiyang dapat mapiit

- gregoriovbituinjr.

11.10.2025

Bato-bato sa langit

BATO-BATO SA LANGIT

Bato-bato sa langit

Hustisya'y igigiit

Pag ginawâ ay lupit

Sa dukha't maliliit

Kayraming pinilipit

Pagpaslang ang inugit

Due process ay winaglit

Mga buhay inumit

Tulad ng abang pipit

Pag bayan ay nagalit

Sa tokhang na pinilit

Bato man, ipipiit

Nanlaban pati paslit?

Tanong natin ay bakit?

Buhay nila'y ginilit

Ng sistemang kaylupit

- gregoriovbituinjr.

11.09.2025

Hinahampas ng bagyong Uwan ang bahay ni Juan

HINAHAMPAS NG BAGYONG UWAN ANG BAHAY NI JUAN

matapos ang bagyong Tino na nanalasang tunay

na higit dalawang daang katao na'y namatay

ngayon nama'y nananalasa na ang bagyong Uwan

kaylakas niyang hinahampas ang bahay ni Juan

kaya ang daranasin natin ay matinding sigwâ

na kung maayos ang kanal sana'y agad mawalâ

paano kung D.P.W.H. gumawa niyon?

flood control project na ba'y guniguni na paglaon?

mag-iingat po tayo kung may yerong lumilipad

na sa atin at sa pamilya'y baka makasugat

mag-ingat din sa open manhole at lestospirosis

sa panahon ngayon ay mahirap nang magkasakit

bahay man ni Juan o kaya'y ang bahay ni Kuya

sana'y maging handâ, at magbayanihan talaga

gawin ay makipagkapwa, at di makasarili

isipin din natin ang kapwa, di lang ang sarili

- gregoriovbituinjr.

11.09.2025

* mapapanood ang munting bidyo sa kawing na:

https://www.facebook.com/share/v/1DN3h3wVNG/ 

Napanalunang aklat

NAPANALUNANG AKLAT

nakinig ako sa zoom nilang talakayan

hinggil sa mga aklat, mula pamantasang

Ateneo, Kagawaran ng Filipino

at sa pa-raffle nila, nanalo ng libro

ang aklat ay Poems ni Martin Villanueva

bagamat ngayon ko lang siya nakilala

di sa personal, kundi sa aklat ng tulâ

nasa Ingles, wala pang walumpung pahinâ

kanina, dumating ang kartero sa bahay

at natanggap ko na ang premyo nilang bigay

dagdag na koleksyon sa munti kong library

nakapagbabasa pa kahit super-busy

sa Ateneo, taos kong pasasalamat

sa librong itong ngayon ay binubulatlat

dedikasyong: "Hope you find something worthwhile in THIS"

ng awtor sa aklat, sa pagod ko'y nag-alis

- gregoriovbituinjr.

11.09.2025

Pasig Laban sa Korapsyon

Pasig Laban sa Korapsyon

Isang Mabigat na Misyon

Tunay na Dakilang Layon

At Tanggap Natin ang Hamon!

- gregoriovbituinjr.

11.08.2025

* Kinatha at binigkas na tulâ sa Musika, Tulâ at Sayaw sa Plaza Bonifacio, Pasig, 11.08.2025